ظاهره جديده لازم تنال إعجابي وتلفت نظري بما فيه الكفايه (بانون وقصه مدافع عصري متكامل):
_ بانون مدافع بيمتلك كل مقومات النجاح ورغم طوله البارع اللي ممكن يوصلك فكره سريعه عنه إنه بطيئ الحركه خصوصاً من الثبات فهو بيعكس النظريه دي تماما وهيجبرك تغير مفهومك لما تشوفه وتتابعه كويس ع الأقل لو الأمر بيتعلق بالحكم ع بانون فقط!
بانون قادر يجاري أي خصم بس مش بإستخدام سلاح السرعه و البرجل الواسع وخفه الحركه اللي بتوازي الريشه ويمكن أقل لأ... الراجل ده فاهم ودارس كل الوضعيات اللي بيتعرضلها عينك إنت بس ع الخطوتين اللي بياخدهم لقدام وبيضحك بيهم ع الخصم وإنت هتفهم....
صلب جدا في إلتحاماته وعينه ع الكوره كويسه جدا ومقدر دايما المكان والزمان اللي بيوصلوه للكوره ف الوقت المناسب بدون أي أخطاء فنيه خاصه ع المستوي الصراعات الثنائيه بيجيدها بطريقه كبيره وده اللي معلي كعبه ع أي مدافع ف حسبتي، ف الكرات العاليه دايما رجليه ثابته ع الأرض بعد كل إرتقاء بيعمله وده بيديله فرص كبيره ف تفادي أي خطأ ممكن يحصل ع مستوي التشتيت
وممكن يدخل ف صراع أرضي بفارق زمني بسيط معندوش مشكله... جرءته ف لعب الكرات مابين الخطوط ف أوقات إنت مضغوط عليك فيها بعرض الملعب الكلام ده ميعملوش غير لاعب معجون كوره وعلشان نكون واضحين أكتر قليل جدا من المدافعين اللي بيمتلك الصفه دي بالأخص وهي كيفيه إختراق الخصم بشكل طولي أثناء التنظيم العالي والضغط العرضي الأمامي وده بيهيأ مساحه زمنيه ممتازه وإرتياحيه كبيره للاعبي الوسط ف الخروج بالكوره لقدام،
ميزه كمان بيمتلكها كاد تكون جديده عليكوا ع الأقل ف العشر سنين الأخيره أو بشكل أدق من وقت إعتزال إبراهيم سعيد وهي الكواليتي العالي ف التاكلينج اللي من خلاله بتبدأ بيه الهجمه وبتخرج منه من غير إستفاده مضاده للمنافس بفاول أو ب تماس كمان...
رجليه دايما محتويه الكوره بشكل عظيم ومفيش فيها أي علو ممكن يسبب أذي للخصوم ودي حاجه أنا شخصيا بحبها جدا فيه (المدافع العاقل نعمه كبيره) ناهيك طبعا عن ثقته ف طلب الكوره وكإنه بلاي ميكر مسئول عن توزيع اللعب وممول للمهاجمين.
مبيتوترش مبيقلش تحت أي ظروف ومع أي نتيجه عنده كفاءه يريح الكوره بمعلمه للشناوي ف أوقات صعبه وحساسه جدا وإبقا حاسب ع قلبك اللي وقع بانون ناسي قلبه ف البيت، ف النهايه حابب أفكرك إن بعد كل اللي بيعمله ده الشورت بتاعه لسه أبيض متبهدلش ومتهانش وده الختم بتاع لقب (السلطان)